في ذكرى معركة باب العزيزية(هدرزت أم أحمد)

Laila Elhoni · #1 07-05-08, 08:58 PM

[align=center]السلام عليكم ورحمة الله وبركاته

كيف حالكم أهلي الليبين

إن شاءالله بخير

تتفكروا المرة اللي فاتت لما حكيتلكم على جريمة سبعة ابريل وكيف قلتلكم أن القذافي ما خلانا ولا شهر نفرحوا بيه زي الناس..؟

واهو توا خش شهر مايو وفعلا مستمر شعورنا بالهم والنكد اللي خلهولنا القذافي في ذاكرتنا

اليوم نبي نحكيلكم على أحداث معركة باب العزيزية أنا نبي نحكيها كيف ما عشتها يعني مش من قرايتي لسرد تاريخي من موقع من المواقع.

لا.... أنا نبي نحكيها من الواقع اللي انا عشته و شفته في هاداكا الوقت.

أنا هاداكا الوقت كنت في المدرسة وقريب وقت المرواح لما سمعت صوت رزم ومتراليوا يعني صوت رزيم والله الحق الحق هاداكا الوقت ما نعرفش حتى شنو بالزبط نوع السلاح لكن اللي نعرفه انه صوت ضرب بسلاح صوت قويييي.

وكان انقوللكم هاداكا النهار كان يوم عجاجات وريح سخوووونة والجو يطبق الخلوق هكي سبحان الله من عند ربي.

عاد لما سمعت الصوت انا والبناويت اللي كانوا يقروا معاي وقالونا توا روحوا فيسع لحياشكم.

من غير ما نندروا والله حتى الطريق انظني ما ريتها شنو شكلها لين وصلت لحوشنا ولقيت امي واقفة تستنى فيا على الباب والجيران يتعايطوا والناس يدعوا ومش عارفين شنو صاير بالزبط.

لكن قالونا انه صار تمرد وهذا اللي قالوهولنا هاداكا الوقت طبعا.

انا انقوللكم حاجة ان الشيطان القذافي من يومه وهو يدير في تعتيم على كل الحقائق اللي عارف انها حتضر بيه.

المهم

طبعا ما نحكيلكمش هاداكا النهار يوم اسود في حياة عرب طرابلس كلهم.

برة برة برة لوينه دوره جايبين مجموعة شباب في حاشاكم سيارة كناسة ويدوروا بيهم في وسط البلاد.

موقف موقف ومشهد حياتي ما عشت وما نعيش مش حننساه للطاغية الكلب الواطي القذافي.

شباب بلادي من خيرة الشباب قتلهم ورماهم في سيارة كناسة يدور بيهم في البلاد هالكافر اللي ما يعرف ربي ولا يخافه.

حسبنا الله ونعم الوكيل فيه حسبنا الله ونعم الوكيل فيه.

وبعدها بدوا مرة مرة يقيموا في الشباب من حياشهم ويجروا فيهم بمنتهى التعسف والظلم يكركروا فيهم تكركير قدام اماليهم بلا رحمة.

هذا هو القذافي هذا هو عدو الليبين هذا ما دار فينا طيلة فترة حكمه الدكتاتوري الفاشي.

المهم خلي انكملكم

قعدوا كل يوم يلموا في الشباب ويطاردوا فيهم ويقتلوا فيهم قدامنا قدام عيونا.

ونتفكر فيهم هادواكا الايامات كانوا آخر أيام الدراسة يعني قريب الامتحانات وطبع لأن بدوا بعض الشباب في كتابة بعض العبارات والشعارات ضد القذافي فكانوا دورة دورة يجونا ويديرونا املاء ماهو باش يعرفوا الخطوط وهذا كله من غباء النظام وجبنه وكان هذا صغيورة زينا في هاداكا الوقت شنو يقدروا ايديروا ماهم ايامات وخلاص.

ايوة

و نتفكر لما قتلوا أحد الشهداء بعد مطاردته وما قدروش يشدوه ضربوه بالرصاص قعد يا ناري يصيح ويقول الله اكبر الله اكبر لين فارقت روحه جسده الطاهر هاداكا الوقت كان في شهر شعبان.

يعني طول شهر شعبان داروه لمطاردة الشباب الليبي البطل وللاعتقال واللي ما قدروش يشدوه قتلوه بالرصاص قدام اماليه وقدام عيونا واللي شدوه استنوا لشهر رمضان شهر الله الكريم وبدا ينفدوا في جرائمهم القذافي وعصابته الحقيرة وبدوا يشنقوا فيهم لا خاف ربي في الشهر المبارك ولا دارله حساب ولا احترم حتى الشهر.

علق مشانقه قتلهم هو وعصابته لترهيب الليبين هالدكتاتور الطاغي اللي يقولوله القذافي.

الله يأخد فيه الحق ياالله يا عاطي يا حي يا كريم

والله الله انا هالمواقف ما ننساها للقذافي لين انموت

وتوا بس نبي انزيد انوقضكم وانبهكم زي كل مرة أن هذا القذافي ما دارش فينا خير هذا مجرم قاتل دكتاتور وطاغي واياماته سووووود رد بالكم تمدوا ايدكم ليه وتتصافحوا معاه والا تنسوا ما دار فينا.

هذا عدو مش حاكم هذا عدو مش ولي أمر هذا عدو هذا عدو الليبين وعدو الله والدين

الله يهلكه يــــــارب ......... الله يهلكه يـــــارب

الله يكتب النصر لليبيا الحرة ولكل الليبين ويتخلصوا من عهد الظلم والاستبداد عهد السرقة والقتل والفساد

عهد القذافي مهلك العباد.

وعاشـــوا أبطال ليبيا الأحرار وكل من تصدى لحكم النظام الطاغي نظام القذافي اللعين

وتحية خاصة مني أنا أم أحمد لأبطالنــا الشهداء وأبطالنا الذين مازالوا على قيد الحياة

أبطال الجبهة الوطنية لإنقاذ ليبيا

وإن شاءالله هذه الذكرى فراق السوء علينا من حكم القذافي

انتوا غير قولوا آميــــن

وهيا تمســـوا على ألف خير

وبالسلامة اليوم

[/align]

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)